پنجاب بھر سے غیر قانونی مقیم غیر ملکی باشندوں کے انخلا کا عمل جاری

پنجاب بھر سے غیر قانونی مقیم غیر ملکی باشندوں کے انخلا کا عمل جاری ہے پنجاب پولیس نے لاہور سمیت صوبہ بھر میں غیر قانونی طور پر مقیم غیر ملکی باشندوں کے خلاف کارروائی کرتے ہوئے اب تک 34 ہزار سے زائد افراد کو ڈی پورٹ کر دیا ہے جن میں بڑی تعداد افغان شہریوں کی ہے۔ ترجمان پنجاب پولیس کے مطابق اس وقت مزید 201 غیر قانونی مقیم افراد ہولڈنگ پوائنٹس پر موجود ہیں جن کی قانونی کارروائی مکمل ہونے کے بعد انہیں بھی ڈی پورٹ کیا جائے گا۔ ڈی پورٹ ہونے والوں میں 13 ہزار سے زائد مرد، 6 ہزار 868 خواتین جبکہ 14 ہزار سے زائد بچے شامل ہیں۔اعداد و شمار کے مطابق ڈی پورٹ ہونے والوں میں 10 ہزار 665 ایسے افراد شامل ہیں جن کے پاس رہائشی ثبوت موجود تھے، 11 ہزار 114 افغان سٹیزن کارڈ ہولڈرز جبکہ 12 ہزار 206 مکمل طور پر غیر قانونی مقیم غیر ملکی بھی شامل ہیں۔آئی جی پنجاب عبدالکریم نے ہدایت جاری کرتے ہوئے کہا ہے کہ صوبہ بھر میں تمام غیر قانونی مقیم افراد کے انخلا کو یقینی بنایا جائے۔ انہوں نے مزید کہا کہ پنجاب پولیس بین الاقوامی قوانین کے مطابق غیر قانونی مقیم باشندوں کے انخلا کی پالیسی پر عمل پیرا ہے۔

(روز نامہ نوائےوقت)

*********************