انسپکٹر جنرل پولیس پنجاب ڈاکٹر عثمان انور نے سرگودھا کے علاقہ تھانہ کینٹ کی حدود میں ایس پی یو کی گاڑی کے ٹرین سے ٹکرانے کے نتیجے میں دو پولیس اہلکار شہید جبکہ تین زخمی ہونے کے افسوسناک واقعہ کا نوٹس لیتے ہوئے ڈی آئی جی ایس پی یو سے رپورٹ طلب کر لی ہے۔ آئی جی پنجاب نے فرض کی راہ میں جانوں کا نذرانہ پیش کرنے والے شہید اہلکاروں کو خراجِ عقیدت پیش کرتے ہوئے کہا کہ پنجاب پولیس اپنے شہداء کے اہلِ خانہ کو تنہا نہیں چھوڑے گی اور شہداء کے لواحقین کی بہترین ویلفیئر ہماری اولین ترجیح ہے۔آئی جی پنجاب نے زخمی پولیس اہلکاروں کو علاج معالجے کی بہترین سہولیات کی فراہمی کی بھی ہدایت کی۔ ترجمان پنجاب پولیس نے بتایا کہ شہید ہونے والوں میں کانسٹیبل امان اللہ اور کانسٹیبل محمد سبطین شامل ہیں جبکہ زخمی اہلکاروں میں ہیڈ کانسٹیبل محمد اویس، کانسٹیبل ابرار اور ڈرائیور کانسٹیبل ضیافت شامل ہیں۔ ترجمان پنجاب پولیس نے مزید بتایا کہ ایس پی یو کے اہلکار معمول کے مطابق گشت کی ڈیوٹی پر مامور تھے کہ ان کی گاڑی ٹرین کی زد میں آ گئی۔ واقعہ کی اطلاع ملتے ہی پولیس کی بھاری نفری موقع پر پہنچ گئی۔
(روز نامہ جناح)
***********************
