آئی جی پنجاب ڈاکٹر عثمان انور کا شہداء پولیس کو خراجِ عقیدت

انسپکٹر جنرل پولیس پنجاب ڈاکٹر عثمان انور نے رحیم یار خان میں کچہ آپریشن کے دوران جانوں کا نذرانہ پیش کرنے والے پنجاب پولیس کے 03 بہادر اہلکاروں کی دوسری برسی پر شہداء پولیس کو خراجِ عقیدت پیش کرتے ہوئے کہا کہ فرض کی راہ میں جانیں قربان کرنے والے عظیم سپوت ہمارے ماتھے کا جھومر ہیں۔ آئی جی پنجاب نے کہا کہ ہم شہداء کی لازوال قربانیوں کو سلام پیش کرتے ہیں اور ہم ہمیشہ ان کی فیمیلیز کے ساتھ کھڑے رہیں گے۔ ترجمان پنجاب پولیس نے بتایا کہ 2023ء میں آج ہی کے دن پنجاب پولیس کے 03 اہلکاروں نے کچہ کے ڈاکوؤں کی فائرنگ کا بہادری سے مقابلہ کرتے ہوئے جامِ شہادت نوش کیا تھا۔ شہداء میں کانسٹیبل محمد ارشاد، کانسٹیبل غلام حسین اور کانسٹیبل محمد قاسم شامل ہیں۔

آئی جی پنجاب نے کہا کہ کچہ کے ڈاکوؤں کے خلاف پولیس آپریشن بھرپور طاقت کے ساتھ جاری رہے گا اور جوانوں کا خون ہرگز رائیگاں نہیں جانے دیا جائے گا۔

(روز نامہ انصاف)