انسپکٹر جنرل پولیس پنجاب ڈاکٹر عثمان انور کی جانب سے ہیڈ کانسٹیبل سے اے ایس آئی رینک پر ترقی پانے والے اہلکاروں کے اعزاز میں خصوصی تقریب منعقد کی گئی جس میں آئی جی پنجاب ڈاکٹر عثمان انور نے لاہور پولیس کے 50 اے ایس آئیز کو نئے عہدے کے رینک لگائے۔ ترقی پانے والوں میں لاہور پولیس کے مختلف شعبوں میں خدمات سر انجام دینے والے اے ایس آئیز شامل تھے۔ آئی جی پنجاب ڈاکٹر عثمان انور نے ترقی پانے والے افسران کو مزید دلجمعی سے فرائض ادائیگی کی ہدایت کی۔ اپنے خطاب میں آئی جی پنجاب نے کہا کہ میرٹ اور سنیارٹی کے مطابق پولیس فورس میں پروموشنز کا سلسلہ جاری ہے، خالی ہونے والی سیٹوں پر مزید کانسٹیبل کو ترقی دیں گے۔ آئی جی پنجاب نے کہا کہ لاہور پولیس نے رواں برس کے دوران 33 پروموشن بورڈ اجلاس منعقد کرکے 04 ہزار اہلکاروں کو اگلے عہدوں پر ترقی دی ہے۔ آئی جی پنجاب نے کہا کہ پولیس فورس کی محکمانہ پروموشن، استعداد کار میں اضافے اور ویلفیئر کیلئے ترجیحی اقدامات جاری رہیں گے۔
*****************