پنجاب پولیس کا خطرناک اشتہاریوں کے خلاف کریک ڈاؤن تیز، قتل کے مقدمہ میں مطلوب اشتہاری 17 سال بعد اٹلی سے گرفتار

انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس کا خطرناک اشتہاریوں کے خلاف کریک ڈاؤن بلا تعطل جاری ہے جس کے تسلسل میں دوہرے قتل کے مقدمہ میں مطلوب خطرناک اشتہاری 17 سال بعد اٹلی سے گرفتار ہو گیا ہے۔ تفصیلات کے مطابق مجرم اشتہاری ابرار حسین نے 2006 میں اپنے ساتھیوں کے ساتھ مل کر سیٹلائٹ ٹاؤن گوجرانوالہ میں دو شہریوں کو قتل کیا تھا، مجرم اشتہاری وقوعہ کے بعد پہلے ساؤتھ افریقہ پھر ہالینڈ فرار ہوگیا تھا ، پنجاب پولیس نے انٹرپول سے ریڈ نوٹس جاری کروایا ، گرفتاری کیلئے مسلسل فالو اپ جاری رکھا۔ ملزم کو بالاخر تین ماہ قبل اٹلی میں گرفتار کیا گیا ، انسپکٹر خالد وریاہ کی قیادت میں ٹیم اشتہاری کو لے کر اٹلی سے پاکستان روانہ ہوئی ۔ اشتہاری ملزم آج رات پاکستان پہنچ جائے گا۔  ترجمان پنجاب پولیس نے بتایا کہ رواں برس بیرون ممالک سے گرفتار ہونے والے اشتہاریوں کی مجموعی تعداد 129 ہو گئی ہے۔ ان اشتہاریوں کو امریکہ، برطانیہ، ساوتھ افریقہ ، متحدہ عرب امارات ، یورپ اور دیگر خلیجی ممالک سے گرفتار کرکے وطن واپس لایا گیا ہے ۔