Oct 27, 2022
انسپکٹر جنرل پولیس پنجاب فیصل شاہکار نے خانیوال تھانہ کہنہ کی حدود میں ملزم کی فائرنگ سے شہید ہونے والے کانسٹیبل سلیم شہزادکو خراج تحسین پیش کیاہے۔آئی جی پنجاب نے کہا کہ دوران ڈیوٹی جام شہادت نوش کرنے والے کانسٹیبل سلیم شہزاد جیسے فرض شناس اہلکار و افسران محکمہ پولیس کے ماتھے کا جھومر ہیں۔ آئی جی پنجاب نے واقعہ کا نوٹس لیتے ہوئے آر پی او ملتان سے واقعہ کی رپورٹ طلب کر لی ہے۔آئی جی پنجاب نے ہدایت کی کہ گرفتار ملزم کو قانون کے کٹہرے میں پیش کیا جائے اور قرار واقعی سزا دلوائی جائے۔ آئی جی پنجاب نے ڈی پی اوخانیوال کو کانسٹیبل سلیم شہزاد کے اہلخانہ سے قریبی رابطہ رکھنے کی ہدایت کی ہے۔شہید کانسٹیبل سلیم شہزاد نے سوگواران میں بیوہ اور چار بچے چھوڑے ہیں، سب سے بڑے بیٹے کی عمر 11 جبکہ چھوٹی بیٹی کی 5 برس ہے۔
(روز نامہ انصاف)
************