انسپکٹر جنرل پولیس پنجاب فیصل شاہکار نے کہا ہے کہ صوبے کے تمام اضلاع میں یوم عاشور کے مرکزی جلوسوں اور مجالس کی سکیورٹی کیلئے جاری کردہ ایس او پیز کے مطابق جامع حکمت عملی کے تحت اقدامات کئے گئے ہیں۔ آئی جی پنجا ب نے کہاکہ دسویں محرم کے جلوسوں اور مجالس کی سکیورٹی کی مانیٹرنگ کے لیے سنٹرل پولیس آفس میں کنٹرول روم 24 گھنٹے فعال ہے جہاں صوبے کے تمام اضلاع میں منعقد ہونے والے جلوسوں اور مجالس کے سکیورٹی انتظامات کی لمحہ بہ لمحہ نگرانی کی جارہی ہے۔ آئی جی پنجاب فیصل شاہکار نے کہاکہ تمام جلوسوں اورمجالس کے طے شدہ اوقات کاراور روٹس کی پابندی کو ہر صورت یقینی بنایا جائے گا جبکہ لاؤڈ اسپیکر ایکٹ کی پاسداری اور شر انگیز مواد کی نشرو اشاعت پر زیرو ٹالرینس اپنائی جائے گی۔ آئی جی پنجاب نے کہاکہ امن کمیٹیوں کا کردار انتہائی اہم ہے تمام مکاتب کے علمائے کرام کے ساتھ مل کر رواداری اور باہمی ہم آہنگی کو فروغ دیا جارہا ہے تاکہ شرپسندی یا نقص امن کو کوئی کوشش رونما نہ ہوسکے۔ آئی جی پنجاب نے آر پی اوز، ڈی پی اوزکوہدایت کی کہ وہ یوم عاشور پر خود فیلڈ میں نکل کر محرم سکیورٹی انتظامات اور متبادل روٹس سے ٹریفک کی روانی کا جائزہ لیں۔ آئی جی پنجاب فیصل شاہکار نے کہا کہ یوم عاشورپر صوبہ بھر میں ڈبل سواری پر پابندی اور دفعہ 144 پر ہر صورت عملدرآمد یقینی بنایا جائے گا۔ ان خیالات کا اظہار انہوں نے آج سنٹرل پولیس آفس میں کنٹرول روم کے دورے کے دوران افسران کو ہدایات دیتے ہوئے کیا۔
(روزنامہ آواز)
*************